¿Yes Optica?

Optica, ye ún de los primeros proyeutos nel so xéneru y constitúi, al mesmu tiempu, una de les manifestaciones artístiques con más impautu mediáticu dientro del arte d'anguaño. 

Dende l'Asociación Cultural Coleutivu Interferencies consiguimos crear un espaciu d'interrelación y divulgación que permite averase al mundu de la esperimentación audiovisual a nivel internacional. Esperimentar significa dir buscando lo desconocío. El videuarte ruempe códigos afitaos, dando protagonismu a la esencia del cine: la lluz, el soníu y el movimientu, llegando en dellos casos hasta l'abstracción dafechu. Ye asina una de les formes más pures y natural de la cultura audiovisual, na midida qu’implica una perceición subxetiva del espaciu-tiempu, al traviés de la teunoloxía de la imaxe electrónica.

Buscamos reacciones nel ámbitu personal del espectador, esmolecelu sobre les sos propies fraxilidaes. Facemos una busca na realidá, pero a partir d'una "recomposición" de los elementos que la formen. Descubriendo cómo construimos les nuestres alcordances, cómo, mesmo la fantasía como los modelos yá afitaos, forman parte de l'articulación de los espacios y l'arquitectura, cómo "domesticamos" la vida per aciu de códigos.

Percorrer el camín que lleva a la videucreación arreya'l buscar pelos caminos del mirar. Una güeyada qu'a lo llargo los años foi tresformándose pa dexanos ver la so complicidá cola historia y la so potencialidá discursiva camudada n'imaxe cultural.

© Copyright Asociación Cultural Coleutivu Interferencies 2005-2010

Español  |  Asturianu  |  English